|
Bæjarstjórn Bæjarstjóri Nefndir Stjórnsýslusvið Fjármálasvið Skóla- og fjölskylduskrifstofa Umhverfissvið Hafnarmálasvið Netföng Skjöl Greinar Eyðublöð Almenningssamgöngur Laus störf Gjaldskrár Myndir og kort Vefir Um Ísafjarðarbæ Forsíða |
|
Ísafjarðarbær Stjórnsýsluhúsinu Pósthólf 56 400 Ísafjörður kt. 540596-2639 Sími: 450 8000 Fax: 450 8008 Banki: 156-26-60 |
|
Jafnréttisáætlun Ísafjarðarbæjar 1997-2002
Jafnréttisáætlun Ísafjarðarbæjar byggir á lögum nr. 28/1991 um jafna stöðu og jafnan rétt kvenna og karla. Markmið jafnréttisáætlunarinnar er að stuðla að jafnri stöðu kvenna og karla í Ísafjarðarbæ. Jafnframt er markmið að bæði konur og karlar nýti sér það lagalega jafnrétti sem er til staðar í atvinnulífinu, innan fjölskyldunnar, í félagslífi og til menntunar. Með samþykki jafnréttisáætlunar fyrir sveitarfélagið er lögð áhersla á frumkvæði bæjaryfirvalda til aðgerða sem jafna rétt kynjanna og stuðla um leið að því að vitund og verknaður verði samofin vilja íbúanna til eflingar jafnrétti. Með jafnréttisáætlun Ísafjarðarbæjar er kveðið á um það hvernig bæjaryfirvöld, stofnanir og fyrirtæki í Ísafjarðarbæ og bæjarbúar geta unnið að jafnrétti, jafnri stöðu og virðingu kvenna og karla og þar með bættum samskiptum og líðan allra bæjarbúa.
Framkvæmd og umfang Jafnréttisáætlun Ísafjarðarbæjar tekur til stjórnkerfis sveitarfélagsins og starfsmanna bæjarins annars vegar og hins vegar til starfsemi og þjónustu sem veitt er hjá stofnunum hans. Fela ber starfsmanni í stjórnkerfi sveitarfélagsins að vinna að því að jafna stöðu kynjanna í fyrirtækjum og stofnunum bæjarins, ásamt því að vera ráðgjafi í stefnumótun í jafnréttismálum. Starfsmaðurinn skal vera bæjaryfirvöldum, fyrirtækjum og starfsmönnum bæjarins til aðstoðar í jafnréttismálum og starfa með félagsmálanefnd Ísafjarðarbæjar. Við skipun kjörinna fulltrúa í félagsmálanefnd skal þess gætt að a.m.k. einn fulltrúi verði talsmaður jafnréttismála og verði til fulltingis þeim starfsmanni sveitarfélagsins er vinnur að þessum málaflokki. Í upphafi hvers árs skulu stofnanir og fyrirtæki, nefndir og ráð á vegum sveitarfélagsins gera starfsáætlun í jafnréttismálum. Um framkvæmdir og stöðu mála skal gerð grein fyrir í lok hvers árs. Árlega skal bæjarstjórn Ísafjarðarbæjar veita viðurkenningu þeirri stofnun eða fyrirtæki í sveitarfélaginu sem best hefur unnið að framgangi jafnréttis-áætlunarinnar. Við skipan í nefndir, ráð og stjórnir á vegum Ísafjarðarbæjar skal leitast við að hlutföll kynja séu sem jöfnust.
Stjórnkerfi og starfsmannastefna Jafnréttisáætlun Ísafjarðarbæjar bendir á skyldu stofnana og fyrirtækja bæjarins að auglýsa stöður til umsóknar. Hvatning til þess kyns sem er í minnihluta í viðkomandi starfsgrein skal koma fram í auglýsingu um starf eða hvatning þess efnis að konur jafnt sem karlar sæki um starfið. Þegar ráða á í stjórnunarstöður skal þess gætt að hafa bæði kynin í huga við gerð auglýsinganna. Við úthlutun verkefna, tilfærslur í störfum og uppsagnir skal þess gætt að kynjum sé ekki mismunað. Þess skal gætt að konur og karlar njóti að öllu leyti sambærilegra kjara og starfsaðstæðna og vísað til laga nr. 28/1991. Það telst þó ekki til mismununar að taka sérstakt tillit til kvenna vegna þungunar, barnsburðar og umönnunar ungbarna. Karlar í föstu starfi hjá Ísafjarðarbæ skulu eftir fæðingu barna þeirra, njóta tveggja vikna fæðingarorlofs á fullum launum. Við ákvörðun launa og fríðinda skal þess gætt að kynjum sé ekki mismunað, sbr. 4. gr. laga nr. 28/1991. Sérstaklega skal leitað eftir því að allir þættir; starfssvið, reynsla og menntun karla og kvenna, séu metnir jafnt. Starfsfólk Ísafjarðarbæjar skal eiga kost á sveigjanlegum vinnutíma, hlutastörfum eða annarri hagræðingu vinnutíma, þar sem því verður við komið. Starfsfólki skal auðveldað að samræma fjölskylduábyrgð starfi sínu.
Fræðsla og ráðgjöf Jafnréttisáætlun Ísafjarðarbæjar bendir á að fræðsla um jafnréttismál og leiðir til að vinna að jafnri stöðu kynjanna skuli vera virkur þáttur í starfi innan stofnana sveitarfélagsins. Einstaklingum, starfsmönnum og stjórnendum í bæjarkerfinu skal standa til boða aðstoð og fræðsla í jafnréttismálum. Þetta á við um störf og starfsaðstæður s.s. kjör og samskipti á vinnustað, kynferðislega áreitni, valdbeitingu og önnur þau mál sem snúa að jafnrétti og samskiptum kynjanna á vinnustað. Beina skal því til skólayfirvalda og forstöðumanna uppeldisstofnana að vinna að jafnri stöðu kynjanna og veita börnum og unglingum hvatningu til að rækta sérkenni sín og jákvæð samskipti kynjanna. Áherslu skal leggja á að kennarar fái þjálfun í að undirbúa nemendur af báðum kynjum fyrir einkalíf og atvinnulíf, félagslíf og fjölskyldulíf. Þá er því beint til skólayfirvalda
Þeim tilmælum er beint til starfsfólks á leikskólum, í skólum, í félagsmiðstöðum og íþróttahúsum að hafa jafnréttissjónarmið að leiðarljósi. Starfsmönnum Ísafjarðarbæjar skal gefinn kostur á að sækja námskeið og fræðslu um samskipti og jöfn áhrif kynjanna á vinnustað. Bæjaryfirvöld skulu hafa frumkvæði í að halda fundi fyrir starfsmenn um jafnrétti kynjanna.
Kynning Útgáfa fræðslu- og upplýsingaefnis um jafnrétti er æskilegt að efla. Jafnréttisáætlun þessi skal kynnt öllum stjórnendum fyrirtækja bæjarins, kjörnum bæjarfulltrúum og embættismönnum. Eftir útgáfu jafnréttisáætlunar Ísafjarðarbæjar skal hún einnig kynnt í öllum stofnunum og fyrirtækjum bæjarins og í fjölmiðlum. Breytingar á stöðu kvenna og karla sem starfa hjá Ísafjarðarbæ skal kanna á hverju kjörtímabili. Endurskoðun jafnréttisáætlunarinnar fari fram í lok hvers kjörtímabils. Nauðsynlegar eru fræðslu- og kynningaraðgerðir að frumkvæði bæjaryfirvalda er hafa það að markmiði að efla jafnrétti kynjanna.
Framkvæmdaáætlun
Árið 1997 Jafnréttisáætlun samin og samþykkt. Ákvörðun tekin um framkvæmd og umfang. Árið 1998 Jafnréttisáætlun gefin út. Umfangsmikil kynning fari fram í öllum stofnunum og fyrirtækjum bæjarins. Árið 1999 Jafnréttisviðurkenning Ísafjarðarbæjar veitt í fyrst sinn. Árið 2000 Viðhorfskönnun til jafnréttismála framkvæmd meðal íbúa Ísafjarðarbæjar Árið 2001 Endurskoðun jafnréttisáætlunar Ísafjarðarbæjar fari fram.
Greinargerð með jafnréttisáætlun Ísafjarðarbæjar
Starfshópur sem unnið hefur að gerð jafnréttisáætlunar fyrir Ísafjarðarbæ gerir nánari grein fyrir áætluninni í þessari greinargerð: Framkvæmd og umfang Eins og fram kemur í áætluninni er henni ætlað að stuðla að jafnri stöðu kvenna og karla í Ísafjarðarbæ. Áætlunin er gerð með stoð í lögum nr. 28/1991 um jafna stöðu karla og kvenna en þar kemur fram í 1. grein að sérstaklega skuli bæta stöðu kvenna til að ná jafnrétti og jafnri stöðu kvenna og karla á öllum sviðum. Því á það ekki að vera nein goðgá að ræða um leiðrétta stöðu kvenna sérstaklega. Nefndarmenn leggja áherslu á að dregið verði úr launamun kynjanna. Hugmynd starfshópsins varðandi skipun kjörinna fulltrúa í félagsmálanefnd er að einhver fulltrúanna hafi jafnréttismál á sinni könnu en starfi annars jafnt öðrum fulltrúum. Hér er um nýjung að ræða sem áhugaverð er fyrir Ísafjarðarbæ. Þessa skipan mála leggjum við til þar sem hvorki er grundvöllur fyrir sérstakri jafnréttisnefnd í sveitarfélaginu né sérstökum starfsmanni. Félagsmálastjóri fylgir jafnréttismálum eftir í sínu starfi og skipuleggur í samráði við félagsmálanefnd. Einnig gæti komið til greina að starfshópurinn sem unnið hefur að gerð jafnréttisáætlunarinnar starfi áfram um sinn. Um gerð áætlunarinnar Starfshópurinn hafði til hliðsjónar lög um jafna stöðu kvenna og karla og einnig aðrar jafnréttisáætlanir sem gerðar hafa verið í öðrum sveitarfélögum og stofnunum. En hver áætlun tekur mið að því umhverfi sem henni er ætlað að þjóna. Fyrsti fundur starfshópsins fór fram 29. júlí og í nóvember 1997 var jafnréttisáætlunin samþykkt í bæjarstjórn og starfshópnum falið að vinna áfram að framkvæmd jafnréttisáætlunarinnar. Ísafjarðarbæ í nóvember 1997 Jónína Ólöf Emilsdóttir Bergljót Pálmadóttir Halldór Halldórsson Þórunn Gestsdóttir, ritari |
Ritstjóri - Umsjón Snerpa ehf.