|
Bæjarstjórn Bæjarstjóri Nefndir Stjórnsýslusvið Fjármálasvið Skóla- og fjölskylduskrifstofa Umhverfissvið Hafnarmálasvið Netföng Skjöl Greinar Eyðublöð Almenningssamgöngur Laus störf Gjaldskrár Myndir og kort Vefir Um Ísafjarðarbæ Forsíða |
|
Ísafjarðarbær Stjórnsýsluhúsinu Pósthólf 56 400 Ísafjörður kt. 540596-2639 Sími: 450 8000 Fax: 450 8008 Banki: 156-26-60 |
|
Fræðslunefnd Ísafjarðarbæjar
Ingibjörg María Guðmundsdóttir yfirmaður skóla- og fjölskylduskrifstofu skolafjolsk@isafjordur.is ERINDISBRÉF NEFNDA Fræðslunefnd Stjórnskipuleg staða Fræðslunefnd heyrir beint undir bæjarstjórn. Forstöðumaður Skóla- og fjölskylduskrifstofu starfa með nefndinni. Nefndin starfar á fræðslusviði, sem er undir stjórn Skóla- og fjölskylduskrifstofu. Eftirfarandi stofnanir og deildir starfa á verksviði nefndarinnar: Leikskólar, grunnskólar, tónlistarskólar og framhaldsskóli. Skipan nefndarinnar Í fræðslunefnd eiga sæti fimm fulltrúar, sem bæjarstjórn kýs til fjögurra ára, að afloknum sveitarstjórnarkosningum samkvæmt ákvæðum sveitarstjórnarlaga, laga um leikskóla, grunnskóla, tónlistarskóla og samþykktar um stjórn og fundarsköp Ísafjarðarbæjar. Á sama hátt eru kjörnir fimm fulltrúar til vara. Auk kjörinna fulltrúa bæjarstjórnar eiga fulltrúi kennara, skólastjóra og foreldra barna í grunn- og leikskóla, rétt á að sitja fundi nefndarinnar, með málfrelsi og tillögurétti. Þá eiga bæjarstjóri og forstöðumaður Skóla- og fjölskylduskrifstofu rétt á að sitja fundi nefndarinnar með málfrelsi og tillögurétti. Bæjarstjórn kýs formann og varaformann fyrir nefndina, en nefndin kýs sér ritara á fyrsta fundi sínum. Hlutverk Hlutverk nefndarinnar er: - að vera bæjarstjórn til ráðgjafar í fræðslumálum;- að gera tillögur til bæjarstjórnar um markmið í fræðslustarfi á vegum sveitarfélagsins; - að hafa eftirlit með því að samþykkt markmið bæjarstjórnar í fræðslumálum nái fram að ganga; - að vera samráðsaðili skólastjóra um ráðningar starfsmanna; - að sjá um að öll skólaskyld börn í bæjarfélaginu njóti lögboðinnar fræðslu; - að starfa með starfsmönnum og gera tillögur um úrbætur í fræðslustarfi og aðbúnaði til skólahalds eftir atvikum; - að sjá um rekstur gæsluvalla. Fræðslunefnd hefur umsjón með þeim stofnunum sem undir nefndina heyra og gerir tillögur til bæjarstjórnar um fjárhagsáætlun vegna þessara stofnana og í fræðslumálum almennt. Nefndin skal hafa eftirlit með því að stofnanir og deildir starfi innan ramma laga og samþykktrar fjárhagsáætlunar á hverjum tíma. Meginhlutverk fræðslunefndar er stefnumótun, en í minna mæli afgreiðsla einstakra mála. Nefndin setur forstöðumönnum og starfsmönnum þeirra stofnana sem undir nefndina heyra starfsreglur um afgreiðslu samsvarandi mála. Starfshættir Um starfshætti nefnda er sérstaklega getið í III. og IV. kafla samþykktar um stjórn Ísafjarðarbæjar og fundarsköp bæjarstjórnar og skal þeim fylgt eftir því sem við á. Fræðslunefnd kemur saman fyrir luktum dyrum á fastákveðnum fundartíma að minnsta kosti tvisvar í mánuði. Skal nefndin gera samþykkt um þennan fundartíma á sínum fyrsta fundi að höfðu samráði við bæjarstjóra. Nefndin skal halda gerðabók. Kjörinn eða ráðinn ritari færir fundargerð í gerðabókina. Í gerðabók skal skrá hvar og hvenær fundur er haldinn, hverjir sitja hann og hvenær honum lýkur. Skrá skal einstök mál, sem tekin eru fyrir á fundinum, hvenær þau komu til, nöfn hlutaðeigandi, meginefni og afgreiðslur nefndarinnar. Í lok fundar skal ritari lesa fundargerðina upp og allir viðstaddir undirrita hana. Fundargerðum kemur ritari nefndarinnar til bæjarritara, sem hefur umsjón með ritvinnslu hennar og leggur hana fram með dagskrá næsta bæjarstjórnarfundar. Formaður og/eða starfsmaður sér um boðun funda. Fundarboðun skal vera skrifleg og tilgreina fundarstað, tíma og dagskrá. Fundarboð skal sent fulltrúum og öðrum sem seturétt hafa á fundum eigi síðar en einum sólarhring fyrir fund. Formaður stýrir fundum nefndarinnar samkvæmt ákvæðum III. og IV. kafla samþykktar um stjórn og fundarsköp Ísafjarðarbæjar. Fundur telst ályktunarhæfur ef meirihluti nefndarinnar er mættur á fundi. Í atkvæðagreiðslu ræður afl atkvæða. Mál telst fallið í atkvæðagreiðslu ef atkvæði falla að jöfnu. Eftirfylgni Formaður og aðrir fulltrúar fræðslunefndar skulu snúa sér til bæjarstjóra með eftirfylgni staðfestra samþykkta nefndarinnar. Réttindi og skyldur fulltrúa Um réttindi og skyldur fulltrúa í fræðslunefnd gilda ákvæði sveitarstjórnarlaga og samþykktar um stjórn og fundarsköp Ísafjarðarbæjar, eftir atvikum. Fulltrúa er skylt að sækja fundi nema lögmæt forföll hamli. Skal hann þá boða staðgengil sinn og láta formann nefndarinnar vita um forföll með góðum fyrirvara. Hver fulltrúi á rétt á að koma máli á dagskrá fundar, enda skilar hann efni þess til formanns a.m.k. tveimur sólarhringum fyrir fund. Fundarmenn skulu hafa hag bæjarins að leiðarljósi við störf sín í nefndinni, en eru ekki bundnir af öðru en sannfæringu sinni, lögum og samþykktum um stjórn og fundarsköp Ísafjarðarbæjar í atkvæðagreiðslu um málefni á vegum nefndarinnar. Fundarmenn eru bundnir þagnarskyldu vegna mála, sem þeir fá vitneskju um í starfi sínu fyrir nefndina og ætla má að leynt eigi að fara samkvæmt eðli máls eða lögum, hvort heldur þau varða einka- eða almannahagsmuni. Fulltrúi skal víkja af fundi við umræður og afgreiðslu mála, sem varða hann sjálfan, skyldmenni hans eða nánustu venslamenn svo mjög að ætla má að það móti viljaafstöðu hans að einhverju leyti. Honum er þó heimilt að gera stuttlega grein fyrir afstöðu sinni áður en hann víkur af fundi. Starfsmannamál Nefndin skal fjalla um umsóknir og gefa rökstudda umsögn til bæjarstjórnar vegna ráðningar skólastjóra grunn- og leikskóla, og aðstoðarskólastjóra grunnskóla. Ákvörðun um ráðningar kennara og annarra starfsmanna grunn- og leikskóla er á valdi skólastjóra, að höfðu samráði við fræðslunefnd. Fræðslunefnd gerir tillögur um ráðningu yfirmanna stofnana. Lög og reglugerðir Í störfum sínum skal nefndin taka mið af þeim lögum og reglugerðum, sem um fræðslumál gilda, sérstaklega lög um leikskóla, grunnskóla, tónlistarskóla og framhaldsskóla. Þá skal nefndin fylgja samþykkt um stjórn Ísafjarðarbæjar og fundarsköp bæjarstjórnar eins og þau eru hverju sinni og kynna sér ákvæði sveitarstjórnarlaga. Þannig samþykkt af bæjarstjórn Ísafjarðarbæjar þann 18. desember 2003. Halldór Halldórsson, bæjarstjóri. |