|
Bæjarstjórn Bæjarstjóri Nefndir Stjórnsýslusvið Fjármálasvið Skóla- og fjölskylduskrifstofa Umhverfissvið Hafnarmálasvið Netföng Skjöl Greinar Eyðublöð Almenningssamgöngur Laus störf Gjaldskrár Myndir og kort Vefir Um Ísafjarðarbæ Forsíða |
|
Ísafjarðarbær Stjórnsýsluhúsinu Pósthólf 56 400 Ísafjörður kt. 540596-2639 Sími: 450 8000 Fax: 450 8008 Banki: 156-26-60 |
|
Um Ísafjarðarbæ Velmegandi samfélag sem byggir á sjávarútvegi Fiskveiðar hafa mótað efnahagslíf núverandi Ísafjarðarbæjar í gegnum aldirnar og þrátt fyrir miklar breytingar á útgerðarmynstri, er sjávarútvegurinn á einn eða annan hátt stærsti atvinnuvegurinn í bænum. Hið stóra sveitarfélag Ísafjarðarbær hefur yfir að ráða mesta fjölda fiskveiðibáta á Íslandi og við bætast margir bátar annarstaðar af landinu yfir sumartímann. Í kringum 30% íbúa Ísafjarðarbæjar vinna við sjávarútveg. Kraftmikið vinnuafl, sameinað nýsköpun og þekkingu, hefur fært bænum mikil viðskipti og í dag hafa samfélög innan Ísafjarðarbæjar náð að snúa vörn í sókn og er fólki aftur farið að fjölga. Mikil þekking á veiðum, vinnslu sjávarafurða og smíði búnaðar tengdum sjávarútvegi er lykillinn að þróun Ísafjarðarbæjar til framtíðar. Ísafjarðarbær hefur alla þá þjónustu sem sjávarútvegurinn þarfnast. Má þar nefna góða hafnaraðstöðu, fiskverkendur, framleiðendur búnaðar til fiskvinnslu, fullkomna pökkunaraðstöðu, vélsmiðjur, slipp, ísframleiðslu, umboðsmenn og viðgerðarmenn rafeindabúnaðar fyrir fiskiskip. Sex verða eitt, hljómar vel Sveitarfélagið Ísafjarðarbær varð til árið 1996 við sameiningu sex sveitarfélaga á norðanverðum Vestfjörðum. Þessi sveitarfélög voru Ísafjarðarkaupstaður, Suðureyrarhreppur, Þingeyrarhreppur, Flateyrarhreppur, Mosvallahreppur og Mýrahreppur. Nýja sveitarfélagið er víðlent og afar fjölbreytilegt og íbúafjöldi þess er á fimmta þúsund manns. Allir styrkja byggðakjarnarnir hvern annan með vaxandi samvinnu og má segja að opnun Vestfjarðaganga árið 1996 hafi skipað stóran sess í að gera þetta samfélag opnara og stórefla svæðið sem heild. Ísafjörður og aðrir bæir í Ísafjarðarbæ, eru mjög nálægt gjöfulum fiskimiðum sem hefur spilað stórt hlutverk í uppbyggingu bæjanna. Ísafjörður þjónar hlutverki miðstöðvar flutninga á svæðinu í lofti, á láði og legi milli annara landshluta. Ísafjörður Ísafjörður við Skutulsfjörð er höfuðstaður Vestfjarða. Skutulsfjörður er fremur þröngur milli hárra og brattra fjalla en inn af honum ganga allmiklir dalir. Ísafjörður hefur ekki farið varhluta af stórfelldum samfélagsbreytingum síðustu ára fremur en aðrir útgerðarstaðir. Breytingarnar hafa getið af sér nýjar áherslur og nú eru á Ísafirði sterk hátæknifyrirtæki sem ekki síst eiga grundvöll sinn í sjávarútvegi. Ísafjörður byggðist upp í kringum útgerð og verslun og eru hér upp úr þarsíðustu aldamótum ein stærstu fyrirtæki landsins í þeim atvinnuvegum. Ísfirðingar hafa verið frumkvöðlar í ýmsu t.d. var fyrst á Íslandi sett vél í bát frá Ísafirði, hér hófust rækjuveiðar á Íslandi og Ísafjörður hefur verið heimili frumkvöðla og framkvæmdamanna. Ástæður þess að hér hefur verið sterk útgerð í aldanna rás eru m.a. þær að hér er góð höfn frá náttúrunnar hendi í nánd við gjöfulustu fiskimið landsins. Einnig er þekking í hliðargreinum útgerðar s.s. járniðnaði og veiðarfæragerð, framleiðslu á tækjum til veiða og vinnslu, óvíða meiri en á Ísafirði. Þetta gerir umhverfi til atvinnureksturs gott og víða leynast enn tækifæri í síbreytilegum heimi sjávarútvegsins. Enginn hefur farið varhluta af þeim breytingum sem átt hafa sér stað á síðustu 10 - 15 árum í íslenskum sjávarútvegi. Umhverfi atvinnugreinarinnar hefur tekið stakkaskiptum sem loks sér fyrir endann á og virðist sem stöðugleiki sé að nást. Þegar breytingar verða, er oft leitað á önnur mið og víða má sjá árangur þess, t.d. í tækni- og hátæknigeiranum og í ferðaþjónustu. Fyrirtæki á Ísafirði hafa náð fótfestu á erlendum mörkuðum í framleiðslu sjávarfangs, tækja til vinnslu rækju, vigtunar sjávarafurða og veiðarfærahönnun og ráðgjöf. Eins og oft áður, er þetta spurning um að aðlaga sig breyttum aðstæðum og tileinka sér nýjungar um leið og þær eiga sér stað. Margar af þeim breytingum sem átt hafa sér stað á síðustu árum hafa skapað tækifæri og er það trú mín að Ísafjarðarbær eigi framtíð fyrir sér í viðskiptaumhverfi nútímans og vörur okkar og framleiðsla eigi eftir að auka hlutdeild sína á innlendum og erlendum mörkuðum. Íbúar á Ísafirði eru um 3200 Þingeyri Þingeyri við sunnanverðan Dýrafjörð er mjög gamall verslunarstaður. Þar stendur pakkhús eða vörugeymsla frá miðri 18. öld, eitt af elstu húsum landsins. Nafnið mun vera dregið af Dýrafjarðarþingi sem þarna var háð til forna. Á Þingeyri var bækistöð bandarískra lúðuveiðimanna seint á 19. öld og franskir duggarar voru þar tíðir gestir. Elsta starfandi vélsmiðja landsins er á Þingeyri. Smiðjan ber nafn Guðmundar J. Sigurðssonar og tók til starfa árið 1913. Til hennar leituðu innlend og erlend skip eftir þjónustu sem var annáluð jafnt innan lands sem utan. Á Framnesi í firðinum norðanverðum var um tíma rekin hvalveiðistöð sem veitti fjölda manns atvinnu. Sunnan Þingeyrar er tilkomumesti fjallgarður Vestfjarða. Hann hefur verið nefndur Vestfirsku alparnir og geta unnendur íslenskrar náttúru fundið þar margt við sitt hæfi. Þar eru margar fallegar gönguleiðir og hjólaleiðir og skipulagðar ferðir í boði. Íbúar á Þingeyri eru um 350. Flateyri Á Flateyri við norðanverðan Önundarfjörð hefur verslun verið stunduð frá því fyrir 1800. Norski umsvifamaðurinn Hans Ellefsen reisti þar hvalveiðistöð árið 1889 og var hún eitt stærsta fyrirtæki landsins. Stöðin brann rúmum áratug síðar og hóf Ellefsen þá smíði annarrar litlu innar við fjörðinn. Verkinu var hætt þegar búið var að hlaða reykháfinn og stendur hann enn rétt við þjóðveginn. Áður en Ellefsen fluttist brott gaf hann Hannesi Hafstein íbúðarhúsið sitt á Sólbakka ofan við Flateyri. Sumir segja að hann hafi selt honum húsið á eina krónu, aðrir segja fimm krónur. Hannes lét taka húsið sundur og flytja til Reykjavíkur. Þetta glæsilega hús er Ráðherrabústaðurinn við Tjarnargötu. Undirlendi fyrir botni Önundarfjarðar er víðlent á vestfirskan mælikvarða og þar er mikið fuglalíf. Gullin sandströndin undan Holti er falleg og hrein og tilvalinn vettvangur strandferða. Íbúar á Flateyri eru um 300. Suðureyri |
Ritstjóri - Umsjón Snerpa ehf.