1. gr.

Markmið ferðaþjónustu fatlaðra er að gera þeim sem eru andlega eða líkamlega fatlaðir og ekki geta nýtt sér almenningsfarartæki vegna fötlunar sinnar, kleyft að stunda atvinnu og nám og njóta tómstunda sbr. 35. gr. laga um málefni fatlaðra. Einnig er henni ætlað að sjá fötluðum fyrir akstri á sérhæfðar þjónustustofnanir skv. 1.-4. tölul. 9. gr. laga nr. 59/1992 sem eru hæfingar- og endurhæfingarstöðvar, dagvistunarstofnanir fatlaðra, verndaðir vinnustaðir og leikfangasafn. Þetta á einnig við um aðrar þjónustustofnanir sem eru fötluðum nauðsynlegar en ekki eru sérstaklega tilgreindar í lögunum.

Ferðaþjónusta fatlaðra er ætluð til afnota fyrir þá íbúa sveitarfélagsins sem eru:

1. Bundnir hjólastól
2. Blindir
3. Ófærir um að nota almenningsvagnaþjónustu vegna annarar fötlunar
4. Ófærir um að nota almenningsvagnaþjónustu vegna tímabundinnar fötlunar.

Aðrir (sjúkir, aldraðir) sem nauðsynlega þurfa á akstursþjónustu að halda geta sótt um hana til Skóla- og fjölskylduskrifstofu og greiða fyrir sama gjald og aðrir.
Einnig geta íbúar í Ísafjarðarbæ sem hafa tímabundið aðsetur en eiga ekki lögheimili í Ísafjarðarbæ átt kost á þjónustunni ef sveitarfélag það sem viðkomandi á lögheimili í er tilbúið að taka þátt í kostnaði vegna aksturs. Skal samþykki þess liggja fyrir áður en þjónusta hefst.

Ferðir til vinnu, skóla, lækninga og endurhæfingar ganga fyrir öðrum ferðum. Fjöldi ferða til annarra einkaerinda er háður takmörkunum, en við það skal miða að þær verði ekki fleiri en 12 á mánuði og heildarfjöldi ferða eigi meira en 60 á mánuði. Ferð er skilgreind í reglum þessum sem akstur milli tveggja staða, en ekki akstur fram og til baka.
Þjónustutími er sem hér segir:
Virka daga frá kl. 8.00 til kl. 18.00.
Laugardaga og sunnudaga sem og aðra hátíðadaga eftir samkomulagi.

Sækja þarf um ferðaþjónustu til starfsmanna Skóla- og fjölskylduskrifstofu á sérstökum umsóknareyðublöðum. Starfsmenn skrifstofunnar afgreiða umsóknir skv. þessum reglum. Skal umsókn metin á grundvelli möguleika umsækjanda til að nýta sér þjónustu almenningsvagna og eða aðra ferðamöguleika. Meta skal aðstæður hverju sinni og er heimilt að óska viðeigandi vottorða og upplýsinga er veitt geta upplýsingar um ástand og þörf hins fatlaða fyrir þjónustu.
Heimilt er að skjóta úrskurði starfsmanna Skóla- og fjölskylduskrifstofu til umfjöllunar félagsmálanefndar.

Gera skal sérstakt samkomulag um akstur hvers umsækjenda og sérstaklega fastar ferðir vegna atvinnu og náms. Panta þarf með dags fyrirvara ef breytinga er óskað á áður gerðu samkomulagi eða ef um óreglulegar ferðir er að ræða. Afpöntun skal gera með minnst 3 klst. fyrirvara, annars telst ferðin með í uppgjöri við notanda.
Þeir sem njóta ferðaþjónustu skulu hafa tilskilin skírteini gefin út af Ísafjarðarbæ.
Gildistími skírteina skal vera:
A. Ársskírteini
B. Þriggja mánaða skírteini
Heimilt er að gera samning við forráðamenn eða aðstandendur um fastar greiðslur vegna ferðaþjónustu einstaklings, þyki slíkt hentugt hverju sinni.

Gjald fyrir hverja ferð skal fylgja gjaldskrá almenningsvagna á svæðinu þar með talin viðurkennd afsláttargjöld. Heimilt er að innheimta hærra gjald ef ekið er út fyrir sveitarfélagið. Gjaldskrárbreytingar eru samkvæmt ákvörðun bæjarstjórnar hverju sinni.

Þjónustusvæðið miðast við mörk sveitarfélagsins. Aksturinn miðast við að og frá anddyri. Aðstoð skal vera fyrir hendi gerist þess þörf.

Farþegar skulu tilbúnir til brottfarar í anddyri brottfarastaðar á umsömdum tíma. Ekki er tryggt að bíll bíði sé farþegi ekki tilbúinn. Ekki er beðið á meðan farþegi sinnir erindi sínu. Bílstjórar sinna ekki sendiferðum fyrir farþega. Farþega sem ekið er til læknis er heimilt að hringja eftir akstri til baka að viðtali loknu, enda var það ekki vitað fyrirfram hve viðtalið tæki langan tíma.
Ferðaþjónusta fatlaðra er sérhæfð þjónusta og þurfa farþegar því að vera viðbúnir töfum eða breytingum á áætlun.

Farþegum er heimilt að hafa með sér aðstoðarmann, sem fer með án endurgjalds, enda greiði hinn fatlaði gjald skv. gjaldskrá.
Geti farþegi ekki ferðast einsamall án þess að valda ökumanni eða öðrum farþegum óþægindum, getur ferðaþjónustan krafist fylgdarmanns með honum.

Reglur þessar eru settar skv. 35. gr. og 9. gr. laga um málefni fatlaðra nr. 59/1992.

Samþykkt á fundi félagsmálanefndar 3. desember 2002.
Samþykkt á fundi bæjarstjórnar 19. desember 2002.