Hlutverk fræðslunefndar

Hlutverk nefndarinnar er:

• að vera bæjarstjórn til ráðgjafar í fræðslu-, íþrótta- og æskulýðsmálum,
• að gera tillögur til bæjarstjórnar um markmið í þessum málaflokkum á vegum sveitarfélagsins,
• að hafa eftirlit með því að samþykkt markmið bæjarstjórnar nái fram að ganga,
• að sjá um að öll skólaskyld börn í bæjarfélaginu njóti lögboðinnar fræðslu,
• að starfa með forstöðumanni SFÍ og gera tillögur um úrbætur í fræðslu-, íþrótta- og æskulýðsstarfi og aðbúnaði til skólahalds og æskulýðsstarfs eftir atvikum og fleira.
• Meginhlutverk fræðslunefndar er stefnumótun.

Erindisbréf nefndarinnar

Skóla- og fjölskylduskrifstofa Ísafjarðarbæjar

Hlutverk Skóla- og fjölskylduskrifstofu Ísafjarðarbæjar (SFÍ) er að veita lögbundna þjónustu við einstaklinga og stofnanir í sveitarfélaginu.  Stofnuninni er skipt upp í tvö svið, félagssvið og skólasvið.  Forstöðumaður er skólastjórum til aðstoðar við skipulagningu skólastarfs.

Sérfræðiþjónusta skóla sem SFÍ veitir er ætlað að stuðla að því að kennslufræðileg og sérfræðileg þekking nýtist sem best í skólastarfi. Kennurum og skólastjórnendum stendur til boða ráðgjöf og stuðningur vegna almenns skólastarfs og einnig vegna nýbreytni- og þróunarstarfa. Einnig veitir SFÍ foreldrum og nemendum ráðgjöf. SFÍ er ætlað að sinna greinabundinni ráðgjöf til skólanna og námsráðgjöf.

Upplýsingarrit um Skóla- og fjölskylduskrifstofu Ísafjarðarbæjar

Skýrsla um stofnun SFÍ.

Skólahverfi  

Ísafjarðarbæ er skipt í fjögur skólahverfi, í hverju skólahverfi er einn heildstæður grunnskóli. 

Skólahverfin eru eftirfarandi: Skólasvæði Grunnskólans á Ísafirði (GÍ) er Skutulsfjörður, Hnífsdalur og dreifbýli í Önundarfirði. Skólasvæði Grunnskólans á Suðureyri er Súgandafjörður. Skólasvæði Grunnskólans á Flateyri er  Flateyri. Skólasvæði Grunnskólans á Þingeyri er  Dýrafjörður og skólasel í Mjólká Arnarfirði.

Samantekt starfshóps um framtíðarskipan á unglingastigi í grunnskólum Ísafjarðarbæjar.

Skólagerð

Í sveitarfélaginu eru starfandi fjórir sjálfstæðir skólar sem skipta má upp í tvo flokka vegna stærðar.  Grunnskólinn á Ísafirði flokkast undir stóran skóla á landsvísu en hinir þrír eru fámennir skólar. Hver skóli skal með tilliti til aðstöðu og mannauðs fullnægja ákvæðum laga og reglugerða um skyldur við nemendur og starfsfólk hvað allan aðbúnað og þjónustu  snertir og vera til fyrirmyndar í skólasamfélaginu á Íslandi.

Húsnæði og skólalóð

Fræðslunefnd leggur áherslu á að húsnæði grunnskólanna og skólalóðir uppfylli ákvæði laga og reglugerða um öryggi og aðbúnað. Lögð er áhersla á vistlegt og rúmgott húsnæði þar sem vinnuaðstaða  nemenda og starfsmanna er til fyrirmyndar. 

Jafnræðis skal gætt eins og kostur er varðandi aðstöðu námsgreina og árganga.  Einnig að gert sé ráð fyrir félagsaðstöðu, mötuneyti og fleiri þáttum sem fylgja nútíma skólahaldi

Skýrsla um húsnæðismál GÍ.

Skipulag skólastarfs

Lögð er áhersla á metnaðarfullt, fjölbreytt og framsækið skólastarf við sem bestar aðstæður. Nemendur og starfsfólk skulu hafa aðgang að fullkominni tækni í nútíma skólastarfi eftir því sem við á hverju sinni.  Skóladagur skal vera  samfelldur eftir því sem unnt er með eðlilegu hádegishléi og fullnægjandi aðstöðu til að matast í hádeginu. Gert er ráð fyrir heilsdagsvistun fyrir yngstu nemendurna (það er 1.- 3. bekkur)  í skólum bæjarins og sérdeild þar sem þörf krefur. Um starfsemi heilsdagsvistunar gilda ákveðnar reglur sem fræðslunefnd setur.

Fjöldi kennslustunda í hverjum árgangi og skipting þeirra á námsgreinar skal vera í samræmi við ákvæði laga, reglugerða og þeirra vinnureglna sem skólinn setur sér í samráði við fræðslunefnd. Auk þess skal miða við sérstöðu hvers skóla eins og hún er skilgreind í skólanámskrá. 

Skólarnir eru hvattir hver um sig til að marka sér ákveðna sérstöðu með tilliti til kennsluhátta, hugmyndafræði og fleiri þátta. Sérstaða hvers skóla kemur fram í skólanámskrá viðkomandi skóla. Almennt skal miða við að nemendafjöldi í hverri bekkjardeild sé í samræmi við samþykktar reglur þar um.

Lögð er áhersla á uppbyggilegt félagslíf á vegum  skólanna í samvinnu við félagsmiðstöðvar og aðra aðila. Skólaakstur er í öllum skólahverfum innan hverfa eftir því sem reglur segja til um og er þess kappkostað að skipulag hans sé eins gott og kostur er. 

Í skólanámskrá skólanna er kveðið á um alla framangreinda þætti og áherslur markaðar.

 Skólanámskrár (handbækur) grunnskólanna í Ísafjarðarbæ.

 Kynningarbæklingar frá skólunum.

Skýrsla um húsnæðismál GÍ.

Reglur um heilsdagsvistun þ.e. markmið, þjónusta, gjaldskrá o.fl.

Samvinna skólastiga og samstarf 

Fræðslunefnd leggur áherslu á mjög gott samstarf grunnskólanna við listaskóla, íþróttafélög, hina ýmsu vinnustaði og fleiri aðila í samfélaginu. Nám í tónlistarskólum, listaskólum og æfingar hjá íþróttafélögum er metið sem valgreinar samkæmt ákveðnum vinnureglum þar um sem byggjast á úrskurðum menntamálaráðuneytisins.

Íþróttafélögin kynni starfsemi sína í skólanum eftir aðstæðum og reynt er að efla tengsl við atvinnulíf meðal annars með vinnustaðaheimsóknum eldri nemenda og foreldraheimsóknum hjá yngri nemendum.

Lögð er áhersla á öflugt og gott samstarf skóla og félagsmiðstöðvar varðandi félagsmál og afþreyingu nemenda og mikilvægt er að félagsmiðstöðin hafi góða aðstöðu innan eða utan veggja grunnskólanna eftir aðstæðum.  Uppbyggilegt félagslíf er mikilvægt forvarnarstarf í skólastarfinu.

Nauðsynlegt er að efla samstarf og samvinnu á milli skólastiga í bæjarfélaginu til að tryggja og auðvelda nemendum flutning á milli skóla og skólastiga. Einnig er mikilvægt að efla samvinnu einstakra skóla í sveitarfélaginu. 

Markmið með því að tengja skólastigin enn betur saman er að gera starfið skilvirkara, markvissara og auka skilning milli aðila.

Samantekt starfshóps um framtíðarskipan á unglingastigi í grunnskólum Ísafjarðarbæjar.

Úrskurður menntamálaráðuneytis um mat á námi í öðrum skólum í stað valgreina í grunnskóla.

Starfsmenn

Fræðslunefnd leggur áherslu á að starfsmannastefna grunnskólanna haldist ávallt í hendur við jafnréttisáætlun- og starfsmannastefnu Ísafjarðarbæjar.

Fræðslunefnd stefnir að því að ráða vel menntað fagfólk í öll kennslu-, stjórnunar-, uppeldis-, umönnunar- og ráðgjafastörf innan grunnskólanna.

Fræðslunefnd leggur sérstaka áherslu á að starfsmönnum verði sköpuð eins góð starfsaðstaða og kostur er.

Jafnréttisáætlun Ísafjarðarbæjar.

Starfsmannastefna Ísafjarðarbæjar.

Samþykktir um launa- og/eða starfskjör kennara o.fl. stétta.

Endur- og símenntun 

Fræðslunefnd leggur ríka áherslu á að skólarnir útbúi metnaðarfulla endurmenntunar­- og símenntunaráætlun hver fyrir sig eða sameiginlega eftir þörfum. Áætlunin skal vera skrifleg og aðgengileg. 

Hlutverk endur- og símenntunar  er að styrkja starfsfólk á faglegum grunni og koma til móts við óskir þeirra og hugmyndir um vöxt í starfi. Einnig er hlutverk endurmenntunar að styrkja skólann faglega sem heild.           

Fræðslunefnd leggur einnig mikla áherslu á að starfsmönnum gefist tækifæri til að mennta sig í heimabyggð, hvort sem um er að ræða endur- og símenntun eða réttindanám og viðbótarnám sem kemur skólunum til góða sem stofnunum ekki síður en starfsmönnum sjálfum.

Skólastjórar eru hvattir til að veita leiðbeinendum viðráðanlegt svigrúm við réttindanám samhliða starfi eftir því sem aðstæður leyfa samanber reglur starfsmenntunarsjóðs Ísafjarðarbæjar. Við gerð endurmenntunaráætlana skóla skal hafa samráð við Skóla- og fjölskylduskrifstofu þar sem hún er umsjónaraðili endurmenntunar í Ísafjarðarbæ.

Áætlanir skólanna eru endurskoðaðar á þriggja ára fresti. Framboð námskeiða innan og utan skólaárs skal taka mið af endurmenntunarstefnu skólanna eftir aðstæðum. SFÍ hefur yfirumsjón með framboði á endurmenntunarnámskeiðum og aðstoðar skólana og leiðbeinir.

Háskólanám og fullorðinsfræðsla er í auknum mæli að ryðja sér til rúms í bæjarfélaginu og er fræðslunefnd einhuga um mikilvægi þess fyrir skólastarfið í heild sinni svo og einstaka starfsmenn. Fræðslunefnd leggur áherslu á að styðja þetta nám og hlúa að því eins og kostur er.

Aðalnámskrá grunnskóla, almennur hluti.

Reglur Þróunar- og starfsmenntunarsjóðs Ísafjarðarbæjar.

Samskipti heimila og skóla

Samkvæmt 15.gr. grunnskólalaganna er skylt að efla samstarf heimila og skóla meðal annars með því að miðla fræðslu um skólamál til foreldra og veita upplýsingar um starfið í skólanum.

Fræðslunefnd leggur jafnframt áherslu á að foreldrar séu fengnir til samstarfs við skólana til að styðja markvisst við skólastarfið og efla tengsl heimila og skóla. Foreldrum sé gerð grein fyrir mikilvægi þess að foreldrar og kennarar séu samstíga í uppeldi barnanna.

Skólastjórar grunnskóla eru ábyrgir fyrir stofnun foreldraráðs sem myndar formlegan vettvang til þess að koma sjónarmiðum foreldra á framfæri við skólann varðandi innihald og áherslur í starfi hans og skipulag skólahalds. Foreldraráði er ætlað að fylgjast með skólanámskrá og öðrum áætlunum um skólahald.  Fræðslunefnd hvetur einnig foreldrahópinn til að setja á stofn foreldrafélög við hvern skóla.

Fræðslunefnd hvetur skólana til að koma á greiðu upplýsingastreymi til foreldra meðal annars með útgáfu fréttablaða og upplýsingarita.

Lög um grunnskóla

Reglugerð um nemendaverndarráð.

Rgl. um foreldraráð ATH

Vímuvarnarstefna

Mikil áhersla er lögð á fyrirbyggjandi starf með öflugum vímuvörnum og hafa skólarnir samstarf við ýmsa aðila í þeim efnum.  Mörkuð hefur verið ákveðin vímuvarnarstefna í sveitarfélaginu. Skólarnir setja sér eigin forvarnarstefnu sem miðar að því að efla heilbrigði, sjálfstæði og sjálfsvitund unglinga. Félagsmiðstöðin, íþróttafélögin og skólinn í samvinnu við foreldra og fleiri aðila eru með markvissa fræðslu um skaðsemi vímuefna. Mikilvægt er að framboð íþrótta og afþreyingar sé fjölbreytt og uppbyggilegt því sá þáttur er afar mikilvægur í öllu forvarnarstarfi. Forvarnarstefna grunnskólanna skal endurskoðuð árlega samhliða endurskoðun skólanámskrár og birt í handbókum skólanna.

Vímuvarnarstefna Ísafjarðarbæjar

Samvinna grunnskólanna

Stefnt verði að því að starfsfólk skólanna geti með markvissum hætti nýtt þá þekkingu sem fyrir er í skólunum svo sem hvað varðar sérkennslu, greinabundna kennsluráðgjöf, mótttöku nýbúa og fl.  Að sama skapi verði stefnt að því að kanna hvernig kennslugögn- og tæki í eigu skólanna geti nýst sem best og kannaðar hugmyndir um miðlægt bóka- og kennslugagnasafn í GÍ fyrir alla skólana.  Fámennu skólarnir hafi samstarf sín á milli um setningu markmiða og þróun kennsluhátta, sem henta þeim. Fræðslunefnd leggur áherslu á samnýtingu hvers konar milli skóla sveitarfélagsins eins og kostur er.  Í þeim efnum má nefna mannauð stofnana, sérfræðiþekkingu ásamt gögnum og tækjum eftir aðstæðum.

Skýrsla um húsnæðismál GÍ.

Samantekt starfshóps um framtíðarskipan á unglingastigi

í grunnskólum Ísafjarðarbæjar.

Öryggi og velferð nemenda

Fræðslunefnd leggur áherslu á þroskavænlegt og örvandi námsumhverfi.  Jafnframt er mikilvægt að öryggis nemenda og starfsmanna sé gætt eftir því sem unnt er.  Í því skyni kynna skólarnir greinargóðar skólareglur sem meðal annars taka til ýmissa öryggisatriða.  Einnig má nefna áætlanir um húsrýmingu til dæmis vegna eldsvoða, eineltisáætlanir og fleira.

Nemendaverndarráð eða annað jafngilt ferli skal vera til staðar í skólum sem vinnur að velferðarmálum nemenda.  SFÍ er skipt í skóla- og félagssvið og mál geta verið unnin á báðum sviðum eða færst milli þeirra eftir eðli málsins. 

Starfsfólk skóla ber að virða þagnarskyldu, hins vegar er tilkynningarskylda til barnaverndarnefndar æðri þagnarskyldunni og ber að tilkynna mál þangað teljist það þess eðlis.

 Reglugerð um nemendaverndarráð.

 Reglur skólanna um nemendaverndarráð eða annað sambærilegt.

Barnaverndarlög.

Lög um félagsþjónustu sveitarfélaga.

Sérkennsla og sérdeild

Fræðslunefnd leggur áherslu á að allir nemendur fái kennslu við hæfi í samræmi við ákvæði laga og reglug.  Nauðsynlegt er að þeir nemendur sem þurfa sérstök kennsluúrræði, það er sérkennslu, fái viðeigandi aðstoð.

Með orðinu sérkennsla er átt við sérstakan stuðning við nemanda eða nemendahóp sem þarfnast tímabundinnar aðstoðar eða samfelldan stuðning jafnvel alla skólagönguna. 

Sérkennsla nær til nemenda með einstaka eða margþætta örðugleika.  Námsörðugleikar geta verið af greindarfarslegum, skynrænum, skapgerðarbundnum, félagslegum og líkamlegum toga. Sérkennsla er kennsla sem er löguð að einstökum nemanda eftir greiningu eða mat sérfræðinga.  Oft þarf sérstaka náms- eða kennsluáætlanir fyrir viðkomandi nemanda.   Í þeim tilvikum sem nemandi er með alvarlega þroskaskerðingu eða alvarlega sértæka námsörðugleika getur verið nauðsynlegt að víkja frá markmiðum í almennu námskránni. Allar upplýsingar um sérkennslunemanda ber að líta á sem trúnaðarmál.

Sérdeild er starfrækt við GÍ sem sérhæfir sig í þjónustu við mikið fatlaða nemendur.  Sú sérdeild þjónustar allt sveitarfélagið.

Skýrsla um húsnæðismál GÍ.

Rgl. um sérkennslu.

Nýbúar

Börn með annað móðurmál en íslensku og íslensk börn sem hafa dvalið langdvölum erlendis teljast nýbúar svo lengi sem talið er að þau þurfi sérstaka aðstoð af framangreindum sökum. 

Í aðalnámskrá grunnskóla þar sem fjallað er  um íslensku sem annað tungumál kemur fram að tilgangur með kennslu í íslensku sem öðru tungumáli er að gera nemendur hæfa til að taka fullan þátt í íslensku samfélagi.  Þetta eru tvítyngdir einstaklingar með rætur og innsýn í tvo eða fleiri menningarheima sem auðga þar með íslenskt mannlíf.

Fræðslunefnd leggur áherslu á að börn af erlendum uppruna og íslensk börn sem dvalið hafi langdvölum erlendis geti nýtt sér íslenskt skólakerfi og þess vegna verði byggt upp öflugt stoðkerfi í kring um þessa nemendur. Miðstöð nýbúafræðslu sveitarfélagsins er í GÍ. Nýbúar fá aukna íslenskukennslu svo lengi sem þörf krefur.  Stefnt er að því að nýbúar fái auk þess kennslu í móðurmáli sínu eftir því sem unnt er.

 Skýrsla um húsnæðismál GÍ.

Ákvæði fræðslunefndar um kennslu í móðurmáli nýbúa. ATH!

Skólaþróun og mat

Einn mikilvægasti þátturinn varðandi framþróun metnaðarfulls skólastarfs er markvisst þróunarstarf samhliða innra og ytra mati í skólastarfinu. Fræðslunefnd leggur mikla áherslu á þessa þætti og jafnframt að skólarnir móti hver um sig og/eða sameiginlega markvissa áætlun um mat og þróunarstarf.  Einnig leggur fræðslunefnd til að altækt ytra mat fari fram í hverjum skóla eigi sjaldnar en á fimm ára fresti.

Áhersla er lögð á að bæta sífellt kennsluhætti og auka  nýbreytnistarf innan skólanna og að skólarnir séu framsæknir og nýjungagjarnir. Skólarnir eru hvattir til að vinna þróunarstarf hvað t.d. kennsluhætti snertir. Að jafnaði skal stefnt að því að eitt þróunarverkefni verði í gangi árlega í hverjum skóla fyrir sig en það fer þó eftir umfangi.  SFÍ skal leiða slíka vinnu eftir óskum og/eða veita faglega ráðgjöf.  Skólarnir skulu sækja um styrki til þessara verkefna til dæmis til Þróunarsjóðs grunnskóla.

Lög um grunnskóla

Aðalnámskrá Grunnskóla